Пояснение к молитвенному правилу.
Ради человеколюбия и спасения душ кающихся родителей совершивших вольное или не вольное убийство своих нерожденных детей, и ради их рожденных детей, и ради пользы церковной и государственной, ради сохранения русского мира — предлагается, покаянное молитвенное правило состоящее из двух покаянных канонов ко Господу и Пресвятой Богородице, утвержденные Священным Синодом от 27.12.2016 г. и 23–24.10.2021 г., с чтением евангелия и покаянными молитвами.
Правило составлено со смысловыми склонениями в мужском и женском родах, по слову апостола Павла «Жена не властна над своим телом, но муж; равно и муж не властен над своим телом, но жена.» (1 Кор. 7.4), что означает не только их обоюдную власть над телом друг друга в супружеской жизни, но и равную ответственности мужа с женой за плод ее чрева. Но будучи главой семьи Евангельская ответственность мужа за убийство младенца больше чем у жены, ибо: «… мужу глава Христос, жене глава — муж, а Христу глава – Бог» (1 Кор. 11:3). Некоторые молитвы имеют склонения во множественном числе, для удобного их применения в молебнах ко Господу и Божией Матери и всем святым во всенародном церковном покаянии со священником и в индивидуальном покаянии кающегося за свой род.
Для пользы церковной и народа Божия, покаянные молебны с предложенными молитвами желательно прочитать хотя бы один раз во всех приходах православной Церкви и всех лечебных учреждениях, где совершаются аборты. Также в государственных и образовательных учреждениях с волонтерами, в целях получения Божьего прощения в грехе массового детоубийства и прекращения братоубийственного истребления и создания социальной атмосферы по негативному отношению к абортам.
Правило необходимо прочитать один раз за каждого убиенного во чреве или рожденного но умершего некрещеного младенчика до семилетнего возраста. Также правило рекомендуется исполнять за всех убиенных младенцев пострадавших от применения спирали из расчета одно убийство за один месяц применения, или иных противозачаточных химических средств из расчета одно убийство за одно применение.
Перед началом совершения правила необходимо получить благословение от священника, как епитимию и наречь имя младенцу. По окончанию правила необходимо получить разрешение от епитимии. Далее, по слову святого Василия Великого (2-ое правило), на усмотрение священника «врачевание же измеряти не временем, но образом покаяния». Правило благоприятно совершать во время Великого или Рождественского постов, в количестве и форме поклонов, на усмотрение священника исходя из немощей и сил кающегося.
Кающимся рекомендуется, создавать миссионерско-благотворительные группы: для установки покаянных крестов с выделением земли в погребение нерожденных и рожденных, но не крещеных православных младенцев на кладбищах или на территории родильных домов; осуществление проповеди для просвещения народа в предотвращении детоубийства; оказания материальной помощи бедным и одиноким роженицам; создания монастырских, приходских и семейных детских домов, по благословению Божьему: «Спасай взятых на смерть, и неужели откажешься от обреченных на убиение?» (Притч. 24.11.)
Покаянное молитвенное правило
скорбящих о младенцах, во чреве убиенных
Во имя Отца, и Сына, и Святаго Духа. Аминь.
Молитва мытаря
Бóже, милостив буди мне грéшному.
Молитва предначинательная
Гóсподи Иисусе Христé, Сыне Бóжий, молитв рáди Пречистыя Твоея́ Мáтере и всех святых, помилуй нас. Аминь.
Слáва Тебé, Бóже наш, слáва Тебé.
Молитва Святому Духу
Царю́ Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди́и вселися в ны, и очисти ны от всякия скверны, и спаси, Блаже, души наша.
Трисвятое
Святый Боже, Святый Крепкий, Святый Безсмертный, помилуй нас. (Читается трижды, с крестным знамением и поясным или земным поклоном)
Слава Отцу и Сыну и Святому Духу, и ныне и присно и во веки веков. Аминь.
Молитва ко Пресвятой Тро́ице
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Молитва Господня
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и прости нам долги наша, якоже и мы прощаем должником нашим; и не введи нас во искушение, но избави нас от лукаваго.
Тропарь, глас 6:
Помилуй нас, Господи, помилуй нас,/ всякаго бо ответа недоумеюще,/ сию Ти молитву, яко Владыце,/ грешнии, приносим: помилуй нас.
Слава: Господи, помилуй нас,/ на Тя бо уповахом,/ не прогневайся на ны зело,/ ниже помяни беззаконий наших,/ но призри и ныне, яко Благоутробен,/ и избави ны от враг наших,/ Ты бо еси Бог наш/ и мы, людие Твои,/ вси дела руку Твоею/ и имя Твое призываем.
И ныне: Милосердия двери отверзи нам,/ Благословенная Богородице,/ надеющиися на Тя, да не погибнем,/ но да избавимся Тобою от бед,/ Ты бо еси спасение рода христианскаго.
Господи, помилуй, (12 раз).
Слава, и ныне:
Приидите, поклонимся Цареви нашему Богу. (Земной поклон)
Приидите, поклонимся и припадем Христу, Цареви нашему Богу. (Земной поклон)
Приидите, поклонимся и припадем Самому Христу, Цареви и Богу нашему. (Земной поклон)
Псалом 50
Помилуй мя, Боже, по велицей милости твоей, и по множеству щедрот твоих очисти беззаконие мое. Наипаче омый мя от беззакония моего и от греха моего очисти мя; яко беззаконие мое аз знаю, и грех мой предо мною eсть выну. Тебе eдиному согреших и лукавое пред тобою сотворих; яко да оправдишися во словесех твоих и победиши, внегда судити ти. Се бо, в беззакониих зачат eсмь, и во гресех роди мя мати моя. Се бо, истину возлюбил eси, безвестная и тайная премудрости твоея явил ми eси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смирeнныя. Отврати лице твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи менe от лица твоего и Духа твоего Святаго не отими от менe. Воздаждь ми радость спасения твоего и духом владычним утверди мя. Научу беззаконныя путeм твоим, и нечестивии к тебе обратятся. Избави мя от кровей, Боже, Боже спасения моего; возрадуется язык мой правде твоей. Господи, устне мои отверзеши, и уста моя возвестят хвалу твою. Яко аще бы восхотел eси жертвы, дал бых убо; всесожжeния не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением твоим Сиона, и да созиждутся стены Иерусалимския; тогда благоволиши жертву правды, возношение и всесожегаeмая; тогда возложат на алтарь твой телцы.
Слава, и ныне: Аллилуиа, трижды.
Каноны совмещенные:
покаянный ко Господу о грехе убийства чад во утробе (аборте) и умилительный ко Пресвятой Богородице, для всех скорбящих погубивших чад во утробе своей, глас 6.
Песнь 1
Ирмос: Яко по суху пешешествовав Израиль,/ по бездне стопами,/ гонителя фараона/ видя потопляема,/ Богу победную песнь поим, вопияше.
Припев: Помилуй мя, Боже, помилуй мя.
Ныне приступих аз, грешный(ая) и обремененный(ая) грехом детоубийства, к Тебе, Владыце и Богу моему;/ не смея же взирати на небо, токмо молюся, глаголя:/ даждь ми, Господи, ум,/ да плачуся дел моих горько.
Припев: Помилуй мя, Боже, помилуй мя.
О, горе мне грешному(ей)!/ Паче всех человек окаяней есмь,/ покаяния несть во мне;/ даждь ми, Господи, слезы,/ да плачуся дел моих горько.
Припев: Пресвятая Богородице, спаси мя.
Яко по суху прешела еси жития мирскаго пучину, Чистая и Пресвятая Дево, Мати Господа Моего и жизни Подателя. Аз же, волнами страстей моих потопляем(а) и яко камень на выи имущи детоубийства грех, молю Твою Божественную благость: призри на душу мою, во мрак отчаяния погруженную, и умоли о прощении ми согрешений тяжких.
Припев: Пресвятая Богородице, спаси мя
Упования образ быша христианом родители Твоя, Дево, яко о своем безчадии горько слезы проливающе, неотступно моляху Бога, да подаст им дитя благословенное. Аз же, дни своя иждивающи и сластем потворствующи, о даре отцовства(материнства)(родительства)[1] николиже радех.
Слава: Безумне, окаянне человече,/ в нерадении о покаянии время губиши;/ помысли житие твое и обратися ко Господу Богу,/ и плачися о делех твоих горько.
И ныне: Искупив Христос люди Своя, спасе их от власти диаволи. Аз же, чадо нерожденное погубивши, самовольне диаволу предахся. Но заступи и умоли Сына Твоего, Пречистая, и мя взыскати, яко овча заблудшее.
Песнь 3
Ирмос: Несть свят,/ якоже Ты, Господи Боже мой,/ вознесый рог верных Твоих, Блаже,/ и утвердивый нас на камени/ исповедания Твоего.
Припев: Помилуй мя, Боже, помилуй мя.
Внегда поставлени будут престоли на судищи страшнем,/ тогда всех человек дела обличатся;/ горе тамо будет мне, грешному(ей), в муку отсылаемому(ей);/ и то ведущи, душе моя, покайся от злых дел твоих.
Припев: Помилуй мя, Боже, помилуй мя.
Праведницы возрадуются, а грешнии восплачутся,/ тогда никтоже возможет помощи нам,/ но дела наша осудят нас,/ темже прежде конца покайся от злых дел твоих.
Припев: Пресвятая Богородице, спаси мя
Аще не милости Твоя, о Богомати, безчисленныя, роду человеческому явленныя, уныла бы душа моя и во отчаяния пучину поверглася бы. Но, на предстательство Твое уповающи, имам надежду спасение улучити.
Припев: Пресвятая Богородице, спаси мя
Иноцы обители некия нечестием досадиша Сыну Твоему, и изрече Он суд Свой праведный, во еже погубити я; темже уста Матере Своея загради, да не изыдет глас прошения. Но абие Пречистая руку Христову от уст Своих отведе дерзновенно, и преложи Господь суд Свой на милость. Сие воспоминающи, уповаю и аз на Тя, Преблагословенная Мати.
Слава: Увы мне великогрешному(ей),/ иже делы и мысльми осквернившийся(шаяся),/ ни капли слез имею от жестосердия;/ ныне возникни от земли, душе моя,/ и покайся от злых дел твоих.
И ныне: Рождеством Сына Твоего, Пресвятая, род человеческий обновися, яко новаго Адама восприят. И мене покаянием паки обновити умоли, на светлость Его взирати не дерзающего(ую).
Конда́к, глас 6:
Не ввери мя человеческому предстательству,/ Пресвятая Владычице,/ но приими моление раба(ы) Твоего(я):/ скорбь бо обдержит мя,/ терпети не могу демонскаго стреляния,/ покрова не имам, ниже где прибегну, окаянный(ая),/ всегда побеждаем(а),/ и утешения не имам, разве Тебе, Владычице мира,/ упование и предстательство верных,/ не презри моление мое,/ полезно сотвори.
Седален, глас 6:
Помышляю день страшный и плачуся деяний моих лукавых:/ како отвещаю Безсмертному Царю,/ или коим дерзновением воззрю на Судию, блудный(ая) аз?/ Благоутробный Отче, Сыне Единородный и Душе Святый, помилуй мя.
Слава, и ныне, Богородичен:
Связан(а) многими ныне пленицами грехов/ и содержим(а) лютыми страстьми и бедами,/ к Тебе прибегаю, моему спасению, и вопию:/ помози ми, Дево, Мати Божия.
Песнь 4
Ирмос: Христос моя сила,/ Бог и Господь,/ честная Церковь/ боголепно поет, взывающи,/ от смысла чиста, о Господе празднующи.
Припев: Помилуй мя, Боже, помилуй мя.
Широк путь зде и угодный сласти творити,/ но горько будет в последний день,/ егда душа от тела разлучатися будет;/ блюдися от сих, человече, Царствия ради Божия.
Припев: Помилуй мя, Боже, помилуй мя.
Почто похоть и блуд безумне твориши,/ сластьми мира сего пленяешися,/ любовь родительску попираеши/ и свое беззащитное чадо убиваеши?/ Покайся убо, душе моя, Царствия ради Божия.
Припев: Пресвятая Богородице, спаси мя
Яко упование крепкое на Бога имущая, весть чудную о безсеменнем зачатии, разум человечь превосходящую, смиренно прияла еси, Благословенная. Настави и мя, како по вере жити и на милость Сына Твоего уповати, Иже воплотися во еже грешники спасти от смерти вечныя.
Припев: Пресвятая Богородице, спаси мя
Не усумнилася еси, Богомати, о промышлении Божественнем, егда Иосиф уведе, яко имаши во чреве чадо и отпустити Тя помысли, но паче молитвою душу укрепляла еси. Научи и мя со упованием молитися, Благая, на смертный грех детоубийства по скудоумию и жестокосердию дерзнувшего(ую).
Слава: О, безумный человече,/ доколе углебаеши, яко пчела, собирающи богатство твое?/ Вскоре бо погибнет, яко прах и пепел,/ но более взыщи Царствия Божия.
И ныне: Взирающи на Сына Возлюбленнаго, ко Кресту пригвождаемаго и муце предаемаго, рыдала еси, Богомати, горце. Ныне же, во славе Небесней одесную Его седящи, не остави о заступлении Твоем грешники неотступно взывающия.
Песнь 5
Ирмос: Божиим светом Твоим, Блаже,/ утренюющих Ти души любовию озари, молюся,/ Тя ведети, Слове Божий,/ истиннаго Бога,/ от мрака греховнаго взывающа.
Припев: Помилуй мя, Боже, помилуй мя.
Воспомяни грехи твоя, окаянный человече,/ како себялюбие, сребролюбие, жестокосердие и похоть чадоубийцею соделаша тя./ Душе моя грешная, того ли восхотела еси?
Припев: Помилуй мя, Боже, помилуй мя.
Трепещут ми уди, всеми бо сотворих вину:/ очима взираяй, ушима слышай,/ языком злая глаголяй,/ всего себе геенне предаяй;/ душе моя грешная, сего ли восхотела еси?
Припев: Пресвятая Богородице, спаси мя
Сына Твоего от смерти избави Ангела повеление, еже во сне Иосиф получи: востав поими Отроча и Матерь Его, и бежи во Египет. Аз же, сном греховным отягчен(а), чадо нерожденное погубих, разумом помрачен(на) пребывающи.
Припев: Пресвятая Богородице, спаси мя
Егда разбойник лютый на пути плени Тебе со Иосифом, светом сияше лице Сына Твоего, Богомати. Темже злодеи умилишася и без вреда отпустиша вы. Аз же чадо свое николиже помиловах и душегубцем сопричислихся.
Слава: Блудника и разбойника кающася приял еси, Спасе,/ аз же един(а) леностью греховною отягчихся/ и злым делом поработихся,/ душе моя грешная, сего ли восхотела еси?
И ныне: Звездою Рождества ведоми, волсви из Персиды ко Христу приидоша; тако и аз, сиянию милости Твоея неотступно следующи, покаянием тщуся достигнути спасительнаго прощения.
Песнь 6
Ирмос: Житейское море,/ воздвизаемое зря напастей бурею,/ к тихому пристанищу Твоему притек, вопию Ти:/ возведи от тли живот мой,/ Многомилостиве.
Припев: Помилуй мя, Боже, помилуй мя.
Житие на земли блудно пожих и душу во тьму предах,/ ныне убо молю Тя, Милостивый Владыко,/ свободи мя от работы человекоубийцы диавола/ и даждь ми разум творити волю Твою.
Припев: Помилуй мя, Боже, помилуй мя.
Кому уподобилася еси, душе моя?/ Каину окаянному первому убийце и Ироду беззаконному детоубийце./ Но Ты, Господи, исторгни мя от греха сего/ и даждь ми сердце творити заповеди Твоя.
Припев: Пресвятая Богородице, спаси мя
Стеняху матери иудейския о младенцех своих, невинно Иродом убиенных. Темже и аз прошу Тя, Пречистая: даждь ми слезы оплакати чада, яже по неверию и злобе загублена быша, и Сына Твоего умоли вселити я на месте покойне.
Припев: Пресвятая Богородице, спаси мя
Во чреве китовем Иона пребываше, дондеже Бог его помилова; аз же жестокосердием своим во чреве погубих чадо, Богом ми дарованное. Темже ныне молю Тя, Пресвятая: из пучины отчаяния мя изведи.
Слава: Воспряни, окаянный человече, к Богу, воспомянув своя согрешения,/ припадая ко Творцу, слезя и стеня,/ Той же, яко милосерд, даст ти ум знати волю Свою.
И ныне: Чрево Твое, Дево Богоизбранная, рая бысть вместилище и Христа обиталище. Аз же самую себе место погибели соделах и страстей игралище. О, моего окаянства горькаго, от негоже молю избавити мя!
Прокимен, глас 4: Пролияша кровь, //их яко воду.
Стих: Вменихомся яко овца заколения.
Евангелие от Матфея гл. 2 ст. 16-17
Тогда Ирод видев, яко поруган бысть от волхвов, разгневася зело и послав изби вся дети сущаие в Вифлиеме и во всех пределех его, от двою лету и нижайше, по времени, еже известно испыта от волхвов. Тогда сбыстся реченное Иеремием пророком, глаголющим: глас в Раме слышан бысть, плачь и радание и вопль мног: Рахиль плачущися чад своих, и не хотяше утешитися, яко не суть.
Кондак, глас 6:
Душе моя, почто грехами богатееши,/ почто волю диаволю твориши,/ в чесом надежду полагаеши?/ Престани от сих и обратися к Богу с плачем, зовущи:/ милосерде Господи, помилуй мя, грешнаго(ую).
Икос:
Помысли, душе моя, горький час смерти/ и страшный суд Творца твоего и Бога,/ Ангели бо грознии поймут тя, душе,/ и в вечный огнь введут./ Убо прежде смерти покайся, вопиющи:/ Господи, помилуй мя, грешнаго(ую).
Песнь 7
Ирмос: Росодательну убо пещь/ содела Ангел/ преподобным отроком,/ халдеи же опаляющее/ веление Божие, мучителя увеща вопити:/ благословен еси, Боже отец наших.
Припев: Помилуй мя, Боже, помилуй мя.
Не надейся, душе моя, на тленное богатство и на неправедное собрание,/ вся бо сия не веси кому оставиши, но возопий:/ помилуй мя, Христе Боже, в чадоубийстве повиннаго(ую).
Припев: Помилуй мя, Боже, помилуй мя.
Не уповай, душе моя, на телесное здравие и на скоромимоходящую красоту,/ видиши бо, яко сильнии и младии умирают, но возопий:/ помилуй мя, Христе Боже, чадоубийцу сквернаго(ую).
Припев: Пресвятая Богородице, спаси мя
В плене́нии вавило́нстем о́троцы дерзнове́нно пла́мень пе́щи угаси́ша; та́кожде росо́ю милости Твоея́, Богома́ти, ороси́ изсо́хшую юдоль души́ моея́, да потеку́т по ней покая́ния ре́ки сле́зныя.
Припев: Пресвятая Богородице, спаси мя
Егда растяше отрок Иисус и мужаше, сердце Твое, Мати Пресвятая, разлуку скорую уведе и скорбию отягчися. Аз же ка́ко дерзну отец(ма́терь)(родителем) нарещися, чадо бо свое не родих, ни взрастих, ниже помиловах, но из утробы изринух зле; аще же оплакати его восхощу, не имам места, идеже упокоися.
Слава: Воспомяни, душе моя, вечное житие, Царство Небесное, уготованное святым,/ и тьму кромешную и гнев Божий злым, и возопий:/ помилуй мя, Христе Боже, тяжко согрешившаго(ую).
И ныне: Скорбию сердце Твое оружие пройде, Дево, познала бо еси, яко Сын Твой Жертву за люди Себе приносит. Аз же, чадо мое погубивши, николиже скорбех, и яко человекоубийца есмь аз, не помышлях.
Песнь 8
Ирмос: Из пламене преподобным росу источил еси/ и праведнаго жертву водою попалил еси,/ вся бо твориши, Христе, токмо еже хотети./ Тя превозносим во вся веки.
Припев: Помилуй мя, Боже, помилуй мя.
Како не имам плакатися, егда помышляю о содеянном мною,/ вем бо зол моих множество, детоубийца сый./ Что убо чаю, и на что надеюся?/ Токмо даждь ми, Господи, прежде конца покаяние.
Припев: Помилуй мя, Боже, помилуй мя.
О, Господи, жизни Подателю!/ За многая Твоя блага воздах Тебе злом, окаянный(ая),/ отвергох пренебесный дар жизни/ и дарованная Тобою чада погубих,/ но во смирении молю:/ даждь мне, Господи, прежде конца покаяние.
Припев: Пресвятая Богородице, спаси мя
Егда на браце в Кане Галилейстей вино истощися, прошение Твое, Дево Пречистая, чудо сотворию, Иисус бо по слову Твоему воду в вино претвори. Темже аз Тя смиренно молю молвити к Сыну Твоему слово о чаде моем убиеннем.
Припев: Пресвятая Богородице, спаси мя
Ты еси Мати Божия, яко Самаго Христа Господа носила еси, дивно родила еси и возрастила еси. Аз же не достоен(йна) отец(матерь)(родителем) чад своих нарещися, темже честному покрову Твоему вверяю их.
Слава: Верую, яко приидеши судити живых и мертвых,/ и вси во своем чину станут,/ старии и младии, владыки и князи, девы и священницы./ Где обрящуся аз?/ Сего ради вопию:/ даждь ми, Господи, прежде конца покаяние.
И ныне: Вси роди человечестии чтут Тя, Пресвятая, и Сына Твоего прославляют, Иже на Кресте вися, Матернему попечению Твоему вся народы земныя предаде. Его же, Христа нашего и Господа, о спасении грешниц, чада своя во утробе погубивших, молити не престай.
Песнь 9
Ирмос: Бога/ человеком невозможно видети,/ на Негоже не смеют чини Ангельстии взирати,/ Тобою же, Всечистая, явися человеком/ Слово Воплощенно, Егоже величающе,/ с Небесными вои Тя ублажаем.
Припев: Помилуй мя, Боже, помилуй мя.
Ныне к вам прибегаю, Ангели, Архангели и вся небесныя силы, у Престола Божия стоящии,/ молитеся ко Творцу своему,/ да избавит душу мою от муки вечныя.
Припев: Помилуй мя, Боже, помилуй мя.
Ныне плачуся к вам, святии патриарси, царие и пророцы,/ апостоли и святителие и вси избраннии Христовы,/ помозите ми на Суде,/ да спасет душу мою от силы вражия.
Припев: Пресвятая Богородице, спаси мя
Не токмо матерей всех Достойнейшая и Славнейшая, но и Честнейшая Ангел и Херувим Превышшая еси. Буди и мне, заблуждшему(й), милостивая Мати, настави, вразуми, помилуй и спаси́мя.
Припев: Пресвятая Богородице, спаси мя
Моляше Ты, Дево Чистая, Господа о прощении врагов Его, темже Савл гонитель, покаявся, апостол первоверховный Павел соделася. О, сила дивная покаяния! О, дерзновение велие пред Сыном и Богом Матере Пречистыя, имже грешницам окаянным врата Небесная отверзаются.
Слава: Ныне к вам воздежу руце, святии мученицы,/ пустынницы, девственницы, праведницы и вси святии,/ молящиися ко Господу за весь мир,/ да помилует мя в час смерти моея.
И ныне: Егда время исхода Твоего наста, Сын Твой и Бог с Небесе сошед, в руце душу Твою прият, велию почесть Высшей Ангелов творяй. Аз же не престану молити Тя, Пречистая, да помянеши мя во Царствии Сына Твоего, паче же чада невинная, матерьми убиенная.
Таже: Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Трисвятое по Отче наш: (см. стр. 13-14).
И тропарь, глас 1:
Объятия Отча отверсти ми(нам) потщися,/ блудно мое(наше) иждих житие,/ на богатство неиждеваемое взираяй щедрот Твоих, Спасе,/ ныне обнищавшее(ие) мое(наши) да не презриши сердце(а)./ Тебе бо, Господи, со умилением зову(ем):/ согреших на Небо и пред Тобою.
Слава, и ныне, Богородичен:
Упование христиан, Пресвятая Дево,/ Егоже родила еси Бога паче ума же и слова,/ непрестанно моли с горними силами,/ дати оставление грехов нам всем,/ и исправление жития, верою и любовию присно Тя чтущим.
Покаянные молитвы
Покаянная молитва за весь род повинный в грехе аборта
Пресвятая Троице, прости меня(нас) и моих(наших) живущих и почивших сродников и всех православных христиан, совершивших грех детоубийства во чреве, по молитвам Богородицы, мучеников младенцев Вифлеемских и всех святых. Аминь.
Молитва о просвещении народа нашего, да избавится от греха детоубийства
О Троице Живоначальная! Боже Святый, Премудрый и Непостижимый! Ты по образу Твоему совершенному/ и подобию предивному /сотворил еси человека яко семью,/ заповедав нам «плодитесь и размножайтесь, и наполняйте землю»/ да, множайшии числом и лицы разнящеся,/ в единении любве пребудем, хваляще Тя /яко дети -Отца своего./ Отпадших же нас не презрел еси, /но и Сына Единороднаго Твоего дал еси, /да не погибнем во веки. /Сей Господь наш Иисус Христос, /от Духа Свята в девственных ложеснах зачатся безсеменно,/ во спасение наше, /явися на земли. /И спожив нам, человеком, /радости и горести наша совершенне познал есть, /яко и Самому рещи Ему о жене раждающей, /яже не помнит скорби за радость, яко родися человек в мир. /Сей убо Господь наш /от младенческих пелен изгнание и всякое лишение претерпе, /паче же Иродовым скверноубийством /детей незлобивых /уязвися всемилостивое Его сердце.
И доныне, /увы нам, /паки и многажды оскверняется земля наша кровми сотен тысящ младенец безвинных,/ иже не проидоша врата жития сего, /света не зревших, /любве матерния яко и защиты отчия не познавших,/ крещения святаго не сподобившихся. /Несть нам мира, /пагубе среде нас умножившейся,/ несть облегчения вины, /несть благословения всенароднаго/ от Бога Тя – Судии нелицеприятна./ Вемы бо, Правосуде, яко за грех сей дух заблуждения нам на порабощение, и к пагубе попустившего,/ вемы, Господи,/ яко гнев Твой, сопротивныя попаляющий;/ вемы, Неложне,/ яко, аще назриши беззаконие, никтоже устоит;/ но вемы Тя – Бога кающихся,/ ко исправлению зовуща грешныя,/ яко у Тебе очищение есть.
Сего ради припадаем Ти,/ из глубины сердечныя взывающе:/ помилуй, Господи, помилуй нас,/ просвети умы и сердца упорствующих в лютом детоубийстве/ и во вражде с Тобой, / и чадами/ и родами своими/ и со славянскими и православными братскими народами пребывающими,/ и от того врагов наших еще более радующих/ и на землю для нашего уничтожения еще более привлекающих,/ обрати сих к покаянию истинному,/ примири со убиенными младенцами,/ настави на путь Евангельского закона правды Твоея,/ сотвори власти и воинства наши богоугодными Тебе/ ими же веси судьбами,/ укрепи немощныя в вере,/ на не движимем камени заповедей Твоих утверди всех нас,/ яко от утробы матерния к Тебе привержени есть мы,/ Господи – Упование наше,/ Господи — Мир наш,/ Жизнь наша, Господи.
О сем умильно призываем в молитву Пречистую Деву-Богородицу/ со святым Предтечею Иоанном,/ и святыя угодники Твоя, Господи:/ прежде мученики-младенцы Вифлеемския,/ вкупе со отроковицами славными Верою, Надеждою и Любовию с материю их Софиею премудрою,/ таже с венценосными отроки-страдальцы Димитрием и Алексием,/ вкупе со всеми царственными страстотерпцы и новомучениками Церкве Русския,/ изрядно же великаго Сергия,/ возгласившаго из утробы матерния Ти, Троице Живоначальней песнь хвалы,/ темже приими/ и наших сердец смиренное моление сие. Аминь.
Молитва покаянная ко Господу Иисусу Христу
О, Боже, Премилосерднейший Христе Иисусе,/ Искупителю грешных,/ ради спасения рода человеческаго/ Ты оставил еси, Всемилостиве, преславная Небеса/ и вселился еси во юдоль плачевную и многогрешную,/ Ты приял еси на Божественная рамена Твоя наша немощи,/ и понесл еси наша болезни;/ Ты, о Страдальче Святый,/ уязвлен был за грехи наша/ и мучи́м за беззакония наша,/ а посему и мы к Тебе, Человеколюбче,/ возносим наши смиренныя мольбы:/ приими их, о Преблагий Господи,/ и снизойди к немощам нашим/ и грехов наших не помяни,/ и праведный гнев Твой/ за беззакония наша на ны движимый отврати от нас.
Кровию Твоею Всечестною обновивый падшее естество наше,/ обнови, Господи Иисусе Христе, Спасителю наш, и нас,/ во тли грехов сущих,/ и утеши сердца наша радостию всепрощения Твоего./ С воплем и безмерными слезами раскаяния/ припадаем к стопам Твоего Божественного милосердия,/ и молим Тя:/ благодатию Твоею очисти нас/ от всех неправд и беззаконий жития нашего./ Да во святыни Твоего Человеколюбия восхвалим Всесвятое Имя Твое,/ со Отцем и Преблагим и Животворящим Духом,/ ныне и присно и во веки веков. Аминь.
Молитва покаянная ко Господу о младенцах убиенных во чреве
Господи, Иисусе Христе, Сыне Божий,/ Источниче жизни и безсмертия,/ пришедый в мир грешныя спасти!/ Призри на нас, недостойных рабов Твоих,/ выю сердца и телесе пред величеством славы Твоея приклоняющих,/ согрешихом бо,/ беззаконновахом,/ неправдовахом пред Тобою,/ но, на щедроты Твоя/ и милость Твою уповающе,/ со слезами молим:/ благоутробне и всемилостиве Господи,/ прости и помилуй нас,/ любовь Твою отвергших,/ закон евангельский поправших,/ страстьми ум свой ослепивших,/ чад своих в безумии убивших,/ иных к сему смертному греху подвигших/ или преступному их намерению не возбранивших.
Вемы, Господи,/ яко достойни есмы огня геенскаго и вечныя муки,/ но имамы и человеколюбия Твоего образы:/ разбойника, мытаря, блудницу, блуднаго сына,/ иже покаянием отверзение дверей Царствия Небеснаго и помилование улучивших./ Темже ко множеству щедрот Твоих взываем:/ приими искреннее раскаяние наше/ и сердце, оскверненное безмерными грехами,/ человеколюбне очисти./ Призри, всесильне Господи, на люди Твоя,/ вразуми братий и сестер наших,/ творящих беззакония;/ возсияй истиною Твоею/ в сердцах заблудших и во тьме пребывающих,/ загради уста нечестивая/ и лукавая, детоубийство проповедующая;/ просвети разум матерей,/ чад своих во чреве своем умерщвляющих;/ удержи руку врача-детоубийцы/ всесильною десницею Твоею/; пресеки творимое кровавое беззаконие.
О, многомилостиве и долготерпеливе Господи!/ Молитвами Пречистыя Твоея Матере,/ Владычицы нашея Богородицы и Приснодевы Марии/ и всех святых,/ наипаче ходатайством святых мучеников младенцев,/ в Вифлееме от Ирода убиенных,/ даруй нам время на покаяние,/ яко да, по заповедем Твоим поживше,/ настоящих зол и будущих вечных мук свободимся/ и со благою надеждою и истинным уверением к тамошнему миру пойдем,/ прославляюще Безначальнаго Твоего Отца,/ с Нимже благословен еси,/ со Пресвятым,/ и Благим,/ и Животворящим Твоим Духом,/ ныне и присно, и во веки веков. Аминь.
Молитва родителей ко Господу Иисусу Христу
за убиенного во чреве младенцева
Помяни,/ Человеколюбче Господи,/ всех от века отшедших не рожденных младенцев,/ во утробе православных матерей нечаянно умерших / от неведомых действий,/ или от трудного рождения,/ или от некоей неосторожности,/ или сознательно загубленных/ и потому не принявшего Святого Крещения.
Не остави Господи милостью Твоею/ и всех усопших православных родителей/ принесших покаяние за грех убийства не рожденных чад своих.
Молитвы к Божией Матери о не рожденных детях
Молитва первая
О, Преблагословенная Мати и Славнейшая всех дщерей земных! К стопам Твоим припадаю и слезно молю от потоков благодати Твоея каплю милости ми подати и оросити сердце мое, изсохшее страстьми и печальми. Просвети лучами Твоея благости помраченный смертными грехми ум мой, да прииду в познание истинныя веры и уразумею грехопадение мое, чадо бо свое во утробе погубивши, не смею взирати на Небо, но токмо о даровании покаяния дерзаю просити.
Неисчетны милости Твоя, Богомати, ко грешному роду человеческому, сего ради молю Тя: якоже древле человеку некоему, на дело зло идущу, даруй и мне нечаянную радость обращения и вразумления Божественнаго; якоже одержимыя различными недуги, утоли и моя страсти неупиваемою чашею Твоего милосердия; яко погибших Взыскание, взыщи и мя, заблуждшего(ую) во гресех; якоже от иноков нерадивых, отведи от мене суд праведный и даруй ми отраду и спасительное утешение, у Сына Твоего милости испросивши; утоли моя печали, слезным покаянием болезнующей души моей утешение дарующи; на смирение Твое Господь призре и Матерь Сына Своего содела Тя, темже и мя настави, како со смирением крест свой носити и милость Божию тем обрести. Разве Тебе не имам ни помощи, ниже надежды иныя, Преблагословенная Дево Мати, Невесто Неневестная, яко да сохраниши мя и покрыеши покровом нескончаемыя Твоея благости во веки веков. Аминь.
Молитва вторая
О Пресвятая Владычице Дево Богородице, спаси и сохрани под кровом Твоим моих чад, волею или неволею из чрева изверженных. Вемы, яко сокрыта от нас их участь в вечности, однако дерзаю в покаяниии просити Тя: укрой их ризою материнства Твоего, ибо не согрешиша они, но по моим грехам не видеша света земнаго.
Мати Божия, вручаю дитя мое всецело Господу моему Иисусу Христу и Твоему, Пречистая, Материнскому смотрению, яко ты еси Божественный Покров рабом Твоим. Аминь.
Молитва третья
Радуйся, Едина Пречистая Мати Единаго Создателя, Господа, Бога и Спаса нашего, Иисуса Христа! Буди ми(нам) Ходатаица в день страшнаго испытания, егда предстану(нем) Престолу Нелицемернаго Судии, яко да огненнаго прещения муки избавлюся(имся) молитвами Твоими, Едина Благословенная. Пресвятая Богородице, спаси нас!
Молитва ко всем святым
О преблаженнии угодницы Божии, вси святии, предстоящии Престолу Пресвятыя Троицы и наслаждающиися неизреченнаго блаженства! Се ныне, в день общаго вашего торжества, милостивно призрите на нас, меньших братий ваших, приносящих вам сие хвалебное пение и ходатайством вашим просящих милости и отпущения грехов у Преблагаго Господа: вемы бо, воистинну вемы, яко вся, елика восхощете, испросити у Него можете. Темже убо смиренно молимся вам: молите Милостиваго Владыку, да подаст нам дух вашея ревности к хранению святых Его заповедей, яко да текше по стопам вашим, возможем земное поприще в добродетельном житии без порока прейти и в покаянии достигнути преславных селений райских, и тамо купно с вами прославляти Отца и Сына и Святаго Духа, во веки веков. Аминь.
Также: Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава, и ныне: Господи, помилуй. (Трижды)
Христос Воскресый из мертвых, смертию смерть поправый и сущим во гробех живот даровавый, истинный Бог наш, молитв ради Пречистыя Твоея Матере, преподобных и богоносных отец наших и всех святых, помилуй и спаси нас, и погибших чад наших яко Благ и Человеколюбец. Аминь.
[1] Понятие родитель применяется в тексте для удобства чтения канона священником для своей паствы.